Tere Haathon Mein

tere haathon mein pighal jaane ko ji chahta hai
aatish-e-shouq mein jal jaane ko jee chahta hai

tujh se ik raaz ki sargoshi bhi kerna chahoon
phir wohi raaz nigal jaane ko jee chahta hai

dil ye chahe ke tere dil mein rahoon dil ban ke
phir usi dil se nikal jaane ko jee chahta hai

wehshat aabad makanon mein nahin jee lagta
shehar se door nikal jaane ko jee chahta hai

hum se ye rasm ki zanjeer bhi kab toot saki
dil ki zid per bhi machal jaane ko jee chahta hai